Homemade Pizza Recipe in Hindi

 

Homemade Pizza Recipe in HindiPizza Italian food hai, lekin aaj ye duniya ke har hisse mein khaya aur pasand kiya jata hai, Hamare India mein bhi pizza ko bahut pasand kiya jata hai. Pizza ko khasker bachhe bahut pasand karte hai. Vaise to pizza market mein asani se mil jata hai lekin achhi gunvatta ka food nahi milta hai. Pizza junk food hota hai, jise daily khaya nahi ja sakta hai. Kyoki pizza mein cheese aur maida ka prayog jyada hota hai isiliye khane mein heavy bhi hota hai. Bazaar mein paise kharch karne se achha hai ki hum pizza ghar mein banaye, khaye aur khilaye. 

Pizza to bahut prakar se banaye jate hai. Ise aap bazaar mein uplabdh half baked pizza base per toppings lagaker bake ker sakte hai, lekin pizza aate (Pizza Dough) aur mozzarella cheese se bane hue pizza ki baat hi kuch aur hi hai. To hum baat karte hai homemade pizza recipe in Hindi…..

Ingredient for pizza dough :

  • Maida- 220 g (2 cup).
  • Olive oil- 3 tbs.
  • Dry yeast- 1tsp.
  • Chini- 1 tsp.
  • Namak- 1/2 tsp.

Ingredient for pizza toppings :

  • Pizza tomato sauce- 4 tbs.
  • Tamater- 2.
  • Shimla mirch- 1.
  • Mozzarella cheese- 50 g.
  • Kali mirch powder- 1/4 tsp se kam.
  • Ajinomoto powder- 1/2 tsp.
  • Olive oil- 1 tbs.

Pizza ke liye Aata kaise taiyar karein :

3/4 cup gunguna paani lijiye, paani mein 1 full chamach yeast ke dane daliye aur usi mein chini bhi mila dijiye. Ab paani ko dhak ker 2-3 minute tak rakh dijiye. 

Maida ko bartan mein chhan ker nikal lijiye. Miada mein olive oil aur namak dal ker achhi tarah mila lijiye, maida ko yeast ke paani ki madad se guth lijiye, guthe hue aate ko 5-7 minute tak achhi tarah masal ker palat-palat ker aate ko chikne hone tak guthiye. Guthe hue aate ko hath mein tel lagaker chikna kerke kisi gahare bartan mein rakhker dhakiye aur towel mein lapetker garam jagah per rakh dijiye. Aata 3-4 ghante mein foolker duguna ho jata hai. Ab pizza banane ke liye aata taiyar hai.

Read also : Veggie Finger Recipe in Hindi 

Pizza banaye (How to make pizza) :

Taiyar hue aate ki goli banaye, aur bilkul thoda sukha maida lapetiye board per rakh ker belan se 10 inch vyas mein adha centimeter mota pizza base bel lijiye.

Ab tamater ko achhe se dhulker patli-patli slice mein kat lijiye. Phir shimla mirch dhuliye aur mirch ke danthal aur beej ko hataker lambe tukade mein kat lijiye. Oven ko 220 Centigrade tak pahle se garam kijiye.

Pizza base ko, pizza baking tray per thoda sa aata chhidak ker rakh dijiye. Ab pizza base ke uper pizza tomato sauce dalker kinare se 1 centimeter chhodte hue ek jaisi satah par failaye. Tomato sauce ke uper tomato slices aur shimla mirch ke tukade ko thodi-thodi door par tukade ko lagaye aur uper se mozzarella cheese ke tukade ya kaddukas kiye hue cheese ko daliye. Mozzarella cheese ke uper crush ki gayi kali mirch aur ajinomoto powder chhidak dijiye aur charo aor kuch olive oil bhi dal dijiye.

Pizza toppings aap apne hisaab se ker sakte hai, lekin yah dhyan rahe ki apni man pasand toppings mein adhik nami na ho nahi to pizza crust achha nahi banega.

Pahle se garam oven mein pizza tray rakhiye. Oven ko 220 centigrade per 20 minute ke liye set ker dijiye aur ab 20 minute bad crisp aur delicious pizza taiyar hai. Garma-garam pizza, pizza cutter se katker serve kariye.

Note : Pizza bake karte samay 10-12 minute per pizza ko check karte rahna chahiye kyoki alag-alag oven mein kafi farak hota hai. Jab pizza bake ho jayega to uper se golden brown aur cheese melt ho jaye to pizza ko oven se nikal lijiye. 

Mai umeed karti hu aapko humari yah Homemade Pizza Recipe in Hindi jaroor pasand aayi hogi, to iss post ko apne  friends circle aur social networking site par like aur share karna na bhulein. Yadi iss post se jude koi bhi saval ya sujhav hai to comments box mein jaroor bataye.

Leave a Reply

Your email address will not be published. Required fields are marked *